Landsstýrið játtar Ukraina 10 milliónir næsta ár

Játtanin til neyðhjálp og menningarsamstarv veksur úr 15,5 mió. kr. upp í 16,5 mió. kr. á fíggjarlógini fyri næsta ár. Harafturat ætlar landsstýrið at lata 10 mió. kr. til Ukraina í 2024.

Landsstýrið er av tí greiðu fatan, at Føroyar eru partur av altjóða samfelagnum, og at Føroyar tí eisini hava skyldu at minka um ójavna í heiminum og at veita neyðstøddum hjálp.

Landsstýrið kann hava menningarsamstarv, sum fevnir um fakliga ráðgeving og fíggjarligan stuðul til lutvísa fígging av verkætlanum í menningarlandi, har ætlanin er at skipa haldgóða fyrisiting, at fáa búskaparvøkstur ella at tryggja sosial framstig.

Neyðhjálp verður latin, tá vanlukkur raka úti í heimi. Seinnu árini er hjálp latin eftir áheitan og í samstarvi við hjálparfelagsskapir

Umframt bráfeingishjálp skulu Føroyar eisini geva neyðstøddum vón um eina bjartari framtíð. Tá tað er møguligt, skal neyðhjálpin tí eisini virka fyri menning, so neyðstødd aftur kunnu lívbjarga sær á burðardyggum grundarlagi.