Dýrari húsaleiga og minni stuðul til útbúgving

Beint eftir summarfrítíðina sendi Almannaverkið út kunning til allar eindir um, at allir leigusáttmálar millum borgarar og Almannaverkið fara úr gildi, og nýggir sáttmálar verða galdandi frá 1. januar 2024.

Í hesum liggur eisini ein hækking av húsaleiguni hjá teimum flestu, sum búgva í íbúð frá Almannaverkinum.

Kringvarpið hevur sæð ein slíkan leigusáttmála.

Sáttmálin er millum eitt fólk við menningartarni og Almannaverkið. Viðkomandi býr í einum kamari, sum er 12 og ein hálvan fermetur í Havn. Kammarið hevur atgongd til felags ves.

Hækkar 500 kr. um mánaðin

Fyri hetta hevur viðkomandi fyrr rindað 2.500 krónur um mánaðin. 1. januar hækkar húsaleigan 500 krónur, so hesin skal rinda 3.000 krónur um mánaðin.

Onnur leigumál hækka enn meira, men tað verður tó gjørt soleiðis, at tað skal ganga eitt ár ímillum, at húsaleigan verður hækkað 500 krónur um mánaðin.

Eitt annað spariátak er, at ung, sum fara á serbreyt í fýra ár, fyri at gera seg klár til arbeiðsmarknaðin, ikki longur skulu fáa stuðul frá Almannaverkinum.

Studni

Stuðulin frá Studna verður varðveittur.

Bara stuðul frá Studna

Higartil hevur ein ungur á serbreyt, sum býr heima hjá foreldrunum, fingið 3.000 krónur um mánaðin frá Almannaverkinum aftrat teimum 2.000, sum tey fáa frá Studna í útbúgvingarstuðuli.

Hesar 3.000 krónurnar skulu nú takast burtur, so samlaði stuðulin verður tær 2.000 krónurnar um mánaðin frá Studna.

Landsstýrið væntar, at hetta átakið fer at spara landskassanum 1,3 milliónir krónur næsta ár.

Fía Petersen

Fía Petersen er forkvinna í Javna.

Kann gerast dýrari sum frá líður

Ætlaðu sparingarnar eru serstakliga óhepnar og kunnu við tíðini fara at kosta landinum nógv meira enn ætlaða sparingin.

Tað er boðskapurin frá Javna, sum júst í hesi løtu viðgerð ætlaðu átøkini hjá landsstýrinum.

Hoyr innslag í útvarpstíðindunum: