Dømdir føroyingar skulu hava betri rættindi á stovni í Danmark

Føroyingar, sum verða dømdir á stovn í Danmark, skulu hava betri rættindi.

Tað ætlar danska stjórnin.

Hon fer at koma við nøkrum lógarbroytingum í hesi tingsetuni hjá fólkatinginum, sum skulu gera støðuna betri hjá føroyingum og grønlendingum, sum vera dømdir at fara á stovn í Danmark.

Fótfjøtur

Stjórnin fer eisini at koma við uppskoti um at broyta føroysku rættargangslógina og lógina um revsifulnað, so til ber at brúka fótfjøtur í Føroyum.

Landsstýrið hevur biðið um uppskotið.

Kriminalforsorgin gjørdi í 2021 og 2022 eitt upprit um møguleikan at brúka fótfjøtur í Føroyum.

Í gildi næsta summar

Niðurstøðan er, at tað ber til at gera somu skipanir, sum tey hava í Danmark.

Lógarásetingarnar um fótfjøtur og um útslúsing, tað er at beina fólki á rætta kós, skulu koma í gildi 1.juli næsta ár.