Joe Biden: Hetta er reinur óndskapur

"Hetta er reinur óndskapur."

Tað segði amerikanski forsetin Joe Biden fyri løtu síðan í eini almennari røðu um tað, sum er hent í Ísrael seinastu dagarnar.

Hann segði, at fólkið í Ísrael hevur upplivað "reindyrkaðan óndskap frá blóðugu hondunum hjá yvirgangsfelagsskapinum Hamas, ein bólkur, hvørs almenna endamál er at drepa jødar," segði Joe Biden.

Amerikanski forsetin vísti á, at meir enn 1.000 fólk hava latið lív í Ísrael, harímillum 14 amerikanskir statsborgarar.

"Foreldur slaktað, meðan tey brúktu sín kropp til at verja síni børn - andstyggiligar søgur um børn, sum verða myrd, heilar familjur dripnar. Ung fólk dripin á einum tónleikafestivali, sum fagnaði friði," segði Joe Biden, sum júst hevði tosað við ísraelska forsætisráðharran Benjamin Netanyahu í telefon.

"Eg segði honum, at um USA hevði upplivað tað sum tit uppliva, hevði okkara aftursvar verið knapt, avgjørt og øgiligt", segði amerikanski forsetin, sum enn einaferð vissaði um, at USA stendur saman við Ísrael, og at Ísrael, eins og øll onnur heimsins lond, hevur rætt til at svara aftur.