Russlandssáttmálin: Uttanlandsnevndin skal kunnast fyrst

Tað verður ikki í hesari vikuni, at vit fáa at at vita, hvat landsstýrið ger við fiskivinnusamstarvið við Russland.

Aksel V. Johannesen, løgmaður, sigur við Dag & Viku, at landsstýrið ætlar at taka eina avgerð í hesari vikuni. Men tað merkir ikki, at avgerðin verður almenn.

Tá avgerðin er tikin, skal landsstýrismaðurin í fiskivinnumálum, sum formliga varðar av málsøkinum, ráðføra seg við uttanlandsnevndina hjá løgtinginum.

Bjarni Hammer

Bjarni Hammer er formaður í uttanlandsnevndini. (Mynd: Bjarni Árting Rubeksen)

Í fyrsta lagi í næstu viku

Tann ráðførslan er ikki umbiðin enn, og hon kann í fyrsta lagi vera eina ferð í næstu viku, sigur Bjarni Hammer, formaður í uttanlandsnevndini. Hann vísir á, at nevndin má hava eitt ávíst skotbrá at seta seg inn í tilfarið, sum landsstýrið hevur at byggja sína avgerð á.

Uttanlandsnevndin, Bárður á Steig Nielsen

Bárður á Steig Nielsen, formaður í Sambandsflokkinum. Andstøðan vil takast upp á ráð í spurninginum um russlandssáttmálan. (Mynd: Bjarni Árting Rubeksen)

Vilja takast upp á ráð

Í felags fráboðan heita teir tríggir andstøðuflokkarnir á samgonguna um at taka andstøðuna við upp á ráð, nú avgerðin um russlandssáttmálan skal takast.

- Málið er størri enn samgonga móti andstøðu. Vandi er fyri, at ein lítil samgongumeiriluti tekur avgerðina einsamallur, og tað er ikki til gagns fyri málið, siga andstøðuflokkarnir.

Aksel V. Johannesen segði við útvarpið i gjárkvøldið, at hann ætlar sær at tosa við andstøðuna, áðrenn ráðførsla verður í uttanlandsnevndini.
----