Samgongumaður atkvøddi ímóti uppskoti frá samgonguni

Ein samgongulimur, Henrik Old í Javnaðarflokkinum, atkvøddi í gjár ímóti einum lógaruppskoti hjá samgonguni.

Talan er um uppskotið, sum loyvir teimum, sum bryggja sterkt, at selja løg, sum er sterkari enn 5,8 prosent á staðnum, har sum løgurin verður gjørdur.

Slík søla kann tó bara vera, tá gestir vitja.

So tað vera fyrst og fremst útlendsk ferðafólk, sum fara at keypa rúsdrekka, tá tey vitja bryggjarí, stendur í viðmerkingunum um ætlaðu lógarbroytingina.

Hendan broytingin í rúsdrekkalógini stendur í samgonguskjalinum.

Henrik Old

Henrik Old atkvøddi ímóti lógarbroytingini. Hann boðaði longu undir fyrstu viðgerð frá, at hann var ímóti uppskotinum. (Savnsmynd)

Sambandsfólk bæði fyri og ímóti

Tríggir sambandsmenn atkvøddu eisini ímóti.

Teir eru Helgi Abrahamsen, Magnus Rasmussen og Erhard Joensen.

Tveir í Fólkaflokkinum, Jørgen Niclasen og Bárður av Lakjuni, og Steffan Klein Poulsen í Miðflokkinum atkvøddu eisini ímóti.

Hini í Sambandsflokkinum atkvøddu fyri. Hini í Fólkaflokkinum vóru ikki í salinum og heldur ikki hin tingmaðurin hjá Miðflokkinum.

Uppskotið var kortini samtykt. 18 atkvøddu fyri og sjey ímóti.

Átta tingfólk vóru ikki hjástødd, tá atkvøtt var.

Triðja viðgerð verður í morgin.