Ætlaði at smugla níggju kilo av hassji við Norrønu

Ein 27 ára gamal maður skal í rættin í Hjørring í dag. 

Hann er ákærdur fyri at royna at smugla 8,6 kilo av hassji til Føroya við Norrønu.

TV2 veit at siga, at maðurin var tikin í Hirtshals 9.juli í fjør.

Politiið heldur, at tann 27 ára gamli maðurin var ikki einsamallur um royndina at smugla.

Fýra onnur fólk eru eisini ákærd.

Ikki var greitt fyri rættarfundin í dag, um tann ákærdi játtaði ella noktaði seg sekan.

Fyri tveimum vikum síðani dømdi rætturin í Hjørring ein 25 ára gamlan mann sjey ára treytaleysa fongsulsrevsning fyri at ætla at smugla sløk sjey kilo av amfetamini, 100 gramm av kokaini og fimm kilo av hassji til Føroya.

Eisini hann var á veg umborð á Norrønu.

Føroya rættur, Dómhúsið

Hassjmál í Føroya rætti

Tvær kvinnur úr Peru, 31 og 41 ára gamlar, eru ákærdar fyri at smugla 793 gramm av kokaini til Føroya.

Tær eru í Føroya rætti í dag.  

Báðar noktaðu seg sekar, tá politiið royndi at avhoyra tær.

Tær hava annars einki viljað sagt við politiið. 

Tollvaldið avdúkaði kvinnurnar, sum høvdu fjalt kokainið í móðurskeiðini.

Hetta var 28.august. Kvinnurnar hava verið í varðhaldi síðani tá. 

Kvinnurnar komu til Føroya við Norrønu.