Mæla til at Troels Lund Poulsen verður nýggjur formaður

Troels Lund Poulsen, verjumála- og búskaparmálaráðharri, verður í løtuni hildin at hava besta møguleikan at gerast nýggjur formaður í Vinstraflokkinum, nú Jakob Ellemann-Jensen hevur lagt frá sær og er givin í politikki.

Millum teirra, sum vísa á Troels Lund Poulsen, eru Søren Gade, fólkatingsformaður, Claus Hjort Frederiksen, fyrrverandi fíggjarmálaráðharri, og Anders Fogh Rasmussen, fyrrverandi forsætisráðharri og formaður í Vinstra,

Anders Fogh Rasmussen sigur seg taka undir við Søren Gade, sum hevur mælt til, at Troels Lund Poulsen og Stephanie Lose, sum er næstforkvinna í flokkinum, taka við leiðsluni.

Formaðurin í tingbólkinum hjá Vinstra, Lars Christian Lilleholt, mælir eisini til, at Troels Lund Poulsen verður nýggjur formaður í flokkinum.

Troels Lund Poulsen sigur, at hann hevur ikki tikið støðu til málið enn. 

Vinstriflokkurin hevur landsfund 18. og 19. november.