Fimm ára fongsul fyri at smugla kokain

Tvær kvinnur eru í dag dømdar fimm ára fongsulsrevsing fyri at smugla kokain til Føroya. 

Kvinnurnar, sum eru ávikavist 41 og 31 ár og ríkisborgarar í Peru, komu til Føroyar við Norrønu í august í ár. 

Kvinnurnar vóru tiknar til viks til kanningar hjá tollvaldinum og tað vísti seg, at onnur kvinnan hevði kr+ogvað kokain uppi á sær. Nærri kanningar vístu, at báðar kvinnurnar eisini smuglaðu kokain invortis. Samlaða vektin var uml. 794 gramm.

Kvinnurnar hava verið varðhaldsfongslaðar, síðani tær komu til Føroya. 

Sera vandamikið rúsevni

Kokain verður vanliga flokkað sum eitt serliga vandamikið rúsevni. Prísurin á gøtuni í Føroyum er umleið 1.800-2.000 krónur pr. gramm.

Ákæruvaldið kravdi, at kvinnurnar skuldu revsast við fimm ára fongsulsrevsing, umframt at tær skuldu vísast úr Føroyum fyri alla tíð. 
 
Ein samdur dómsmansrættur dømdi kvinnurnar fimm ára treytaleysa fongsulsrevsing. Kvinnurnar blivu samstundis útvístar fyri alla tíð. Rætturin legði hald á kokainið. 
 
Verjarnir skutu dómin inn fyri landsrættin, men góðtóku, at kvinnurnar skulu verða varðhaldsfongslaðar til málið verður viðgjørt í Landsrættinum.

Ákæruvaldið fer nú at taka støðu til, um tað eisini skal skjóta dómin inn fyri Landsrættin.