Tveir bilførarar skuldsettir fyri at koyra ávirkaðir av rúsevnum

Politiið hevur í nátt steðgað tveimum bilførarum, sum eru skuldsettir fyri at koyra ávirkaðir av rúsevnum.

Í øðrum førinum var ein bilur steðgaður í norðurøkinum og í hinum førinum í Eysturoynni.

Í Eysturoynni vóru eisini tvey fólk tikin við meira rúsevnum uppi á sær, enn teimum tørvaði til egið brúk.

Vakthavandi sigur, at politiið kann visitera fólk, um illgruni er um rúsevni, og so var í hesum báðum førunum.

Politiið hevur eisini í øðrum førum í nátt gjørt slíkar kanningar, men uttan at nakar var tikin.

Ein maður, sum var ólátaður og breyt skilhaldsreglurnar, varð koyrdur í brummuna at sova rúsin av sær.

Onkur ferðsluóhapp hava eisini verið.

Í hálkuni í gjáramorgunin vórðu tveir bilførarar tiknir á bóli, so bilarnir koyrdu útav, annar við brúnna um Streymin og hin við Ljósáir. Báðir bilarnir gjørdust vrak.

Og um áttatíðina í gjárkvøldið rendi ein bilur inn í síðuna á einum øðrum, tí bilførarin ikki helt sína víkiskyldu. Hetta var á krossvegnum oman á kaina á Tvøroyri.