Jarðskjálvtar ávirka søluna hjá Icelandair

Íslendska flogfelagið Icelandair merkir eisini ávirkanina av jarðskjálvtunum við Reykjanes.

Flogfelagið sigur í eini fráboðan, at sølan av flogferðaseðlum til Íslands komandi vikurnar er væl minni enn roknað varð við, og at tað uttan iva stendst av jarðskjálvtunum og vandanum fyri eldgosi á Reykjanesi.

Enn er flogferðslan til og úr floghavnini í Keflavík ikki ávirkað, og Icelandair hevur ikki havt nakrar avlýsingar ella broytingar orsakað av jarðfrøðiliga virkseminum.

Bogi Nils Bogason, forstjóri í Icelandair, sigur sambært Vísir, at Icelandair hevur nógvar royndir við, at sterku náttúrumegirnar kunnu ávirka flogferðsluna, og at felagið er væl fyrireikað til møguligar avbjóðingar orsakað av tí jarðfrøðiliga virkseminum, sum nú er á Reykjanesi.

Hann roknar eisini við, at Icelandair kemur út úr 2023 við einum yvirskoti, hóast sølan av flogferðaseðlum nú er minni enn væntað.