Íbúðarbygningar seta trygdina á sjónum í vanda

Hóast ávaringar og frámæli hevur Tórshavnar býráð einmælt samtykt at broyta byggisamtyktina fyri økið við Kerjalon á Oyggjarvegnum til høga bústaðarbygging.

Tað órógvar signalini og setir trygdina hjá sjófólkunum í vanda, um  meira verður bygt tætt við Sendistøðina uppi á Varða í Havn, har MRCC hevur átta mastrar og antennur, sum eru álitið fyri millumbylgjusignalini. 

Men nú verður eftir ætlan bygt beint við antennurnar, tí Tórshavnar býráð hevur broytt byggisamtyktina, og tað liggur í kortinum, at íbúðargfelagið Mark skal byggja beint við antennurnar.

Antennurnar uppi á Varða vórðu settar upp av fyrstan tíð í 1950-unum.

Dennis Holm, landsstýrismaður, sum hevur ábyrgd fyri trygdini á sjónum, heldur, at býráðið má taka málið upp aftur til viðgerðar.

Heðin Mortensen, borgarstjóri í Tórshavnar kommunu, ætlar at lurta eftir teimum hoyringum, sum koma inn, og kanska gera tillagingar, men ætlanin er kortini, at Mark skal sleppa at byggja við Oyggjarvegin.