Løgmaður: ES er sinnað at styrkja samstarvið við Føroyar

Løgmaður: ES er sinnað at styrkja samstarvið við Føroyar
Aksel V. Johannesen hevur hitt forkvinnuna í ES-nevndini, Ursulu von der Leyen, í Brússel
Aksel V. Johannesen, løgmaður, og forkvinnan í ES-nevndini, Ursula von der Leyen.
 
14.12.2023 - 10:09

Aksel V. Johannesen, løgmaður, hevur í morgun verið á fundi við ES-nevndarforkvinnuna, Ursula von der Leyen, í Brússel.

Á fundinum umrøddu løgmaður og ES-nevndarforkvinnan, hvussu Føroyar og ES kunnu styrkja samstarvið. Føroyar eru partur av Evropa, og løgmaður legði á fundinum dent á, at geopolitiska støðan økir týdningin av tættari samstarvi við ES.

Løgmaður vísti somuleiðis á breiða politiska viljaní Føroyum, um at styrkja yvirskipaða samstarvið við ES og at betra um marknaðaratgongdina fyri virkaðar fiskavørur.

 

 

Góður fundur

- Vit høvdu ein góðan og gevandi fund. Eg greiddi ES-nevndarforkvinnuni frá føroysku støðuni og okkara ynskjum. Eftir fundin haldi eg, at tað er týðiligt, at ES er sinnað at styrkja um samstarvið, og eg eri bjartskygdur um, at vit fara at síggja ítøkilig úrslit, sigur Aksel V. Johannesen, løgmaður, í tíðindaskrivi.

Seinasta árið hevur verið arbeitt við at orða eina avtalu um ein yvirskipaðan samstarvskarm um viðurskiftini millum Føroyar og ES. Arbeiðið er nú komið so langt, at væntandi er komið á mál tíðliga næsta ár.

Løgmaður nýtti somuleiðis høvið at bjóða ES nevndarforkvinnuni til Føroya á vitjan.

Hetta er fyrstu ferð, at løgmaður hevur fund við forfólkið fyri ES-nevndini. Á fundinum vóru eisini danski forsætisráðharrin, Mette Frederiksen og grønlendski landsstýrisformaðurin, Múte B. Egede.

Hoyr samrøðu, sum Elin Winther Poulsen gjørdi við løgmann í útvarpstíðindunum: 

 

0 seconds of 0 secondsVolume 90%
Press shift question mark to access a list of keyboard shortcuts
00:00
00:00
00:00
 

 

Er kopiera
Nýggjastu sendingar í SV
Týsdag 20. mai
Veðrið
192138
Týsdag 20. mai
3-2 (28. apríl 2025)
192112
Týsdag 20. mai
3-2 (19. mai 2025)
192108
Sunnudag 18. mai
Andakt
192017