Vitlíki er ársins orð 2023

Lurtarar hava sent Góðan morgun Føroyar uppskot um ársins orð, og tað komu óvanliga nógv uppskot inn í ár. 

Burtur úr rúgvuni vóru 10 orð vald at vera við í kappingini. 

• avgjald
• fótfjøtur
• gongugjald
• havnarstongsul
• heimloysi
• ja takk-tilboð
• lønarlyft
• tingkvinna
• tøkugjald
• vitlíki

Tá avtornaði var tað orðið vitlíki, sum er føroyska orðið fyri AI, artificial intelligence.

Dómsnevndina mannaðu Lena Reinert, limur í Málráðnum, Jón Brian Hvidtfeldt, formaður í felagnum Føroysk Miðlafólk, og Jastrid á Dalbø, næstforkvinna í felagnum Føroyamál.

Jón Brian Hvidtfeldt helt, at havnarstongsul skuldi vera ársins orð, meðan Jastrid á Dalbø vísti á vitlíki. 

Tískil var tað Lena Reinert, ið átti avgerandi atkvøðuna, og hon vísti eisini á vitlíki. 

Hoyr avgerðina her:

Áttanda ársins orð

Um vit taka saman um orðini, ið hava verið vald undanfarin ár, sær listin soleiðis út:

2016: hjúnabandslóg
2017: fiskivinnunýskipan
2018: ræstkjøtaburgari 
2019: heimafriður
2020: sóttarhald
2021: sammóðir
2022: stuttflutt
2023: vitlíki

Ársins orð í Danmark: Chat GPT
Ársins orð í Norra: KI generert
Onglandi: Rizz, charisma