Frí fosturtøka til og við 12. viku

Kvinnur, sum búgva í Føroyum, skulu fáa møguleika at fáa fría fosturtøku til og við  12. viku í viðgongutíðini.

Tað stendur í grein 1 í uppskotinum um nýggja fosturtøkulóg hjá Bjarna Kárasyni Petersen, landsstýrismanni í lógarmálum. 

Hóast freistin sambært grein 1 er farin, kann kvinna fáa fosturtøku eftir 12. viku í viðgongutíðini, um lív og heilsa hjá kvinnuni er í vanda, ella um inntrivið er neyðugt fyri at forða fyri, at likamliga og sálarliga heilsan viknar munandi, og vandin fyri hesum er læknaliga grundaður.

Ótíðarhóskandi lóg  

Galdandi lóg um fosturtøku er frá 1956 og er á mangan hátt ótíðarhóskandi, sigur Bjarni Kárason Petersen. 

Seinastu árini hevur nógv kjak staðist av lógini, og tíðin er nú komin at endurskoða lógina og gera hana meira tíðarhóskandi, sigur landsstýrismaðurin. 

Í løtuni hevur Bjarna Kárason Petersen tíðindafund um uppskotið um fosturtøkulógina, sum nú verður sent til ummælis.