Spyr verjumálaráðharran um kanónir á verjuskipum

Sjúrður Skaale, fólkatingsmaður, spyr nú Troels Lund Poulsen, verjumálaráðharra, um vantandi útgerð umborð á donsku verjuskipunum, sum eisini sigla í føroyskum sjógvi.

Danmarks Radio avdúkaði í morgun, at kanónirnar á donsku verjuskipunum, sum sigla kring Føroyar og Grønland, hava ikki virkað tey seinastu 15 árini. Tað vísa skjøl, sum DR hevur fingið innlit í.

Fólkatingsmaðurin vísir á, at tað er sera álvarsamt, at verjuskipini eru virkin uttan grundleggjandi verjumøguleikar.

Danskt sjóverjuskip, sjóverjuskip

Danska kringvarpið hevur avdúkað, at kanónirnar á donsku sjóverjuskipunum hava ikki virkað í fleiri ár. 

Hann vísir eisini á, at hetta samsvarar ikki við ætlanirnar um at seta loftseftirlitsradara á Sornfelli.

DR avdúkaði, at fleiri manglar eru á skipunum, eisini á teimum nýggjaru skipunum í Knud Rasmussen-klassanum.

Sjúrður Skaale spyr verjumálaráðharran, um hann kann góðtaka, at verjan hevur vitað um trupulleikarnar í drúgva tíð, og ikki hevur rættað teir.