Tað verður serligt at møta Norra

 - Tað verður serligt at møta Norra.

Tað sigur føroyski strikuspælarin, Helgi Hildarson Hoydal, sum hevur spælt í norskum hondbólti í nógv ár.

 - Eg havi spælt saman við einum í norska hópinum, og kenni nakrar av hinum eitt sindur.


Eitt av bestu liðunum

Norra er eitt av sterkastu liðunum, sum er við í Týsklandi, og Helgi Hildarson Hoydal ivast ikki í, at teir fáa ein harðan dyst leygarkvøldið.

 - Vit vita, at teir eru væl skipaðir, hava eina góða verju og ein góðan málmann, og tað eru ting, sum vit mugu gera væl betri fyri at hava nakran møguleika í morgin, sigur royndi strikuspælarin.


Stórur miðlaáhugi

Fleiri norskir miðlar vóru og tosaðu við føroysku landsliðsspælararnar fyrrapartin, sum høvdu úr at gera.

 - Tað er jú ein lang søga millum Føroyar og Norra - 1000 ár aftur í tíðina - so tað er nokkso skeg, at Norra hevur áhuga fyri hesum dystinum, sigur Helgi Hildarson Hoydal úr Kristiansand Topphåndbold.