Tryggjaði sær finaluplássið í evstu løtu

Við máli í evstu løtu tryggjaði Tróndur Kragesteen Neistanum pláss í steypafinaluni í hondbólti.

Í seinnu hálvfinaluni ímóti KÍF í Kollafirði bóðu teir bláu um leikbrá, tá bert 11 sekund vóru eftir av dystinum. Eitt mál í síðsta álopinum kundi senda Neistan í finaluna.

Tað eydnaðist, og nú bíða vestmenningar í dystinum um steypið.

Javnir dystir

KÍF hevði vunnið fyrru hálvfinaluna í Havn við einum málið, og tí vóru kollfirðingar lítil favorittur undan seinna dystinum í kvøld. 

Men Neistin leyp avstað frá byrjan og var frammanfyri 11-7 í steðginum.

Í seinna hálvleiki nærkaðist heimliðið spakuliga, og tá 14 sekund vóru eftir var javnleikur samanlagt, 41-41. Tá var tað, at veteranurin hjá Neistanum avgjørdi.

Seinast Neistin var í finaluni var í 2022, tá teir taptu heili 28-12 fyri H71.

Seinast teir bláu vunnu finaluni var í 2019, tá tað endaði 23-22 ímóti Kyndli.

Í gjár vann VÍF 32-28 á Kyndli.