Ongi donsk verjuskip í føroyskum øki

Hvidbjørnen átti at verið í føroyskum øki nú, men orsakað av, at bæði skipini í Grønlandi liggja við maskinbreki, er Hvidbjørnen farin til Grønlands.

Hetta merkir, at eftirlitið við føroyskum øki í løtuni fyrigongur við fylgisveinaeftirliti og við at flúgva í økinum.

Men flogførini hjá donsku verjuni hava eisini trupulleikar. Tað eru Challenger-flogførini, sum verða nýtt í Norðuratlantshavi, og tey hava eisini havt trupulleikar í seinastuni, upplýsir danska verjan fyri DR.

Tað var júst eitt av Challenger-flogførunum, sum hjálpti til í leitingini, tá Kambur sakk sunnanfyri tann 6. februar. Flogfarið var í fyrstu atløgu seinkað til Føroya, tí tað hevði tekniskar trupulleikar.

Edvard Bjarnason, deildarileiðari á MRCC, sigur, at tað hevur ikki so stóra ávirkan á trygdina í føroyskum sjóøki, at onki danskt verjuskip er her. Tí vanliga klárar Vørn allar bjargingar við føroysku skipunum og tyrluni.

Arktisk Kommando, bindeled Færøerne, vil ikki viðmerkja støðuna, tí talan er um viðurskifti, sum eiga at vera svarað longur uppi í skipanini, siga tey.

Støðan í donsku verjuni verður nøgv umrødd í Danmark í løtuni. Millum annað hava somu skip, sum nú liggja við maskinbreki, ikki kunna brúkt kanónirnar í fleiri ár.