Gongd í haga: Kommunur fáa ov stórar skyldur

Lógaruppskotið um gongd í haga leggur alt ov stórar skyldur á kommununa. 

Tað sigur Klaksvíkar kommuna í hoyringarsvari til landsstýrismannin í ferðavinnumálum, sum er á veg í løgtingið við lógaruppskoti um at skipa ferðavinnuna.

Í hoyringarsvarinum skrivar Klaksvíkar kommuna, at inntøkuparturin hjá kommununi er alt ov lítil, landsstýrismaðurin fær alt ov stórar heimildir, og harumframt eru nógvir ósvaraðir spurningar og nógv ógreið viðurskifti í lógaruppskotinum.

Ikki kjølfesti í lokalsamfelagnum 

- Lógaruppskotið hevur ikki kjølfesti í lokalsamfeløgum, har ferðavinnan í stóran mun setir sín dám, skrivar Klaksvíkar Kommuna og vísir á, at slíkt, víttfevnt lógaruppskot, ið hevur so stóra ávirkan á kommunu, jarðareigarar, bøndur, vinnu, borgarar og bygdir, átti at verið nógv greiðari. 

Víðari vísir kommunan á, at allir áhugapartar áttu at verið tiknir við í fyrireikandi lógararbeiði. Sannlíkt hevði lógaruppskotið tá verið betri, greiðari og meira semjusøkjandi, skrivar kommunan.

Klaksvíkar Kommuna mælir tí til, at lógaruppskotið um at skipa ferðavinnuna ikki verður lagt fyri løgtingið í hesi tingsetuni.

- Mælt verður til, at lógaruppskot, í munandi broyttum og bøttum líki, verður heldur lagt fram í næstui tingsetu, skrivar Klaksvíkar kommuna.