Eingin avsláttur - slakari orkuskifti

Tað hevur verið ein gularót hjá fólki at leggja um til grøna hitakeldu ella at fáa sær elbil, at tey hava fingið mvg'ið afturrindað ella hava fingið bíligari streym. Men nú ætlar landið við tíðini at steðga við hesum, og tað fer at ganga út yvir orkuskiftið.

MVG afturberingin steðgar í 2028, og herfyri boðaði SEV frá, at avslátturin á 40 oyru fyri kwt fyri tey, sum fáa sær ein grønan elmálarar, fer niður í helvt í 2028 og dettur burtur í 2030.

Gularótin við bíligari prísi hevur havt nógv at siga fyri grøna orkuskiftið higartil, sigur Kári Mortensen, deildarleiðari á Umhvørvisstovuni.

Millum 5 og 10 prosent av bilunum í Føroyum eru nú elbilar, og umleið 4-5.000 húsarhald hava lagt um til grøna hitaskipan. Tað fer at taka umleið 10 ár at leggja restina um, væntar Kári Mortensen.