Seks fólk bóðu um hjálp úr fjøllunum

Á páskum hava trý útlendsk pør havt brúk fyri hjálp, tí tey vóru føst í fjøllunum ella í bili.

Langafríggjadag bóðu fólk um hjálp, tí tey vóru føst í kavanum við Slættaratind. Tey vóru í leigubili.

Leygardagin fór eitt par til gongu úr Tjørnuvík til Saksunar.

Komin hálva leið kom mjørki á tey.

Tey bóðu um hjálp. 

Men nakað seinni lætti mjørkin. Tey boðaðu so frá, at teimum nýttist ikki hjálp kortini. Tey vendu við aftur til Tjørnuvíkar.

Og seinnapartin í gjár gekk eitt par seg fast á Køtlum, oman fyri Árnafjørð.

Ein staðkendur fekk staðfest, hvar tey vóru, og tyrla hjá Atlantic Helicopters var send eftir teimum.

Tey vóru flogin á Landssjúkrahúsið til kanningar.