Landsverk bestemmar í Sandoyartunlinum: Listin skal burtur

Nú er líkt til, at nógv umrødda listin hjá Edwardi Fuglø í Sandoyartunlinum verður tikin niður. 

Landsferðslunevndin hevur nevniliga staðfest, at Landsverk er landsvegamyndugleiki í Sandoyartunlinum. 

Limir í Landsferðslunevndini eru Landsverk og løgreglan, sum eru myndugleikar, og Akstovan og Ráðið fyri ferðslutrygd, sum eru ráðgevandi limir.

Sandoyartunnilin, Edward Fuglø, listamaður,

Ikki á einum máli

Nevndin var tó ikki á einum máli um, hvørja ávirkan umrødda listin hevur á ferðsluna í tunlinum.

"Trupulleikin, sum Landsverk sær hann, er ikki sjálv listin, men staðsetingin av listini," sigur Dan Sofus Hofgaard, deildarleiðari hjá Landsverki. 

Næsta stigið er at spyrja Samferðslumálaráðið, har Dennis Holm er landsstýrismaður, um ráðið tekur undir við avgerðini hjá Landsferðslunevndini.

Tekur Samferðslumálaráðið undir við avgerðini hjá Landsferðslunevndini, so er listin í Sandoyartunlinum ein saga blot. 

Sandoyartunnilin, hátíðarhald í Sandoyartunlinum

Ósemja um myndugleikan

Tað var dagin eftir, at Sandoyartunnilin læt upp 22. desember í fjør, at Sigurd Leifsson Lamhauge, táverandi stjóri í Landsverki, álegði tunnilsfelagnum at taka listaverkini hjá Edwardi Fuglø í Sandoyartunlinum niður. Landsverkstjórin segði, at listarverkini vóru til ampa fyri ferðslutrygdina. 

Teitur Samuelsen, stjóri í tunnilsfelagnum, skúgvaði boðini til viks og segði, at Landsverk ikki var myndugleiki í undirsjóvartunlum.

"Tað er nú staðfest, at tað er Landsverk," sigur Dan Sofus Hofgaard, deildarleiðari hjá Landsverki