Stuldurin í Klaksvík: Pengarnir ikki komnir afturíaftur

Teir nógvu pengarnir, sum vóru tiknir í innbrotinum í Keypsamtøkuni í Klaksvík, eru ikki komnir afturíaftur. Og einki nýtt er um innbrotið, sum var sunnumorgunin 24. mars.

Tveir menn vóru tiknir tá. Teir vóru avhoyrdir, men nokta seg sekar. Politiið bað ikki um at fáa menninar varðhaldsfongslaðar.

Men teir eru framvegis skuldsettir, sigur Kári Jacobsen, leiðari á kanningardeildini hjá løgregluni. Eingin annar er skuldsettur, sigur hann. 

Ymiskt, sum var funnið á innbrotsstaðnum, var sent til Danmarkar til kanningar. Svar er ikki komið haðani enn.

Málið verður framvegis kannað, sigur Kári Jacobsen. 

Løgreglan heitti á fólk um at boða frá, um tey vistu nakað um innbrotið. Eingin hevur gjørt vart við seg, sigur Kári Jacobsen.

Nógvir pengar vóru stolnir í innbrotinum. Hvussu nógvir, vil løgreglan ikki upplýsa.