Veljarakanning: Vinstriflokkurin tódnar niður í helvt

Tingbólkurin hjá danska Vinstraflokkinum hevði tódnað niður í helvt, um fólkatingsval var í dag.

Tað vísir nýggj veljarakanning hjá Epinion, sum er gjørd fyri danska kringvarpið. 

Veljarakanningin er søguliga vánalig, tí ongantíð fyrr hevur flokkurin staðið til at fáa so lítla undirtøku, síðani Epinion fór at gera veljarakanningar fyri DR í 2008. 

Bara 6,5 prosent av donsku veljarunum høvdu atkvøtt fyri flokkinum í dag.

Vinstriflokkurin er minkaður niður í helvt síðani seinasta fólkatingsval, tá ið flokkurin fekk 13,3 prosent av atkvøðunum.

Ein undirtøka upp á 6,5 prosent hevði havt við sær, at tingbólkurin hjá flokkinum hevði tódnað úr 22 niður í 11 tingfólk.

Verjumálaráðharrin, Troels Lund Poulsen, sum vitjaði í Føroyum í gjár, er formaður í Vinstraflokkinum.