- Tíðindi, mentan og ítróttur
Makrelurin er á veg úr føroyskum sjógvi
<div>Makrelurin er av álvara farin at nærkast fiskimarkinum á veg úr føroyskum sjógvi. Føroysku skipini, sum royna í ein landnyrðing úr Fugloynni, eru tætt við ES-markið. Av tí at eingin avtala er um makrelin, sleppa føroysku skipini ikki at fiska makrel hjá ES ella Norra.</div><div><br></div><div>Okkurt um hálvt hundrað túsund tons eru eftir av føroysku makrelkvotuni. Men tey seks nótaskipini eru um at vera liðug við sína kvotu, sum er 55.000 tons í ár. Skipini kunnu goyma tíggju prosent til næsta ár. Verða tey tonsini tald við, klára nótaskipini kvotuna, tey fingu í 2012.</div><div><br></div><div><b>Fara á sildaveiðu</b></div><div><br></div><div>Tá makrelurin er liðugur, fara nótaskipini at fiska sildina, sum tey hava eftir, sigur Jógvan Jespersen, stjóri í Felagnum Nótaskip. Nótaskipini eiga 27.000 tons av norðhavssild í ár. Nakað er longu fiskað saman við makrelinum, so millum 15.000 og 20.000 tons eru eftir.</div><div><br></div><div><b>Fleiri skip liggja</b></div><div><br></div><div>Í løtuni liggja fýra ísfiskatrolarar, sum Fiskiveiðueftirlitið hevur lagt, tí teir høvdu ov nógva sild sum hjáveiðu. Tveir trolarar eru lagdir í fýra vikur og hinir í tvær vikur. Bæði reiðaríini hava tó kært avgerðirnar hjá Fiskiveiðueftirlitinum til Føroya rætt. Føroya rættur hevur ikki viðgjørt málini enn.</div><div><br></div><div>Frá 22. til 24.oktober hittast embætisfólk í strandarlondunum í London at gera eina roynd at semjast um, hvussu makrelurin skal býtast millum londini.</div><div><br></div><div> </div><div> </div>
