Venjarin: Vit spæla nærum uttan mistøk

Føroyar spældu mestsum lýtaleyst í sannførandi 34-27 sigrinum á Norðurmakedónia mikukvøldið. 

Tað helt landsliðsvenjarin, Peter Bredsdorff-Larsen, sum serliga rósti verjuspælinum, sum hepnaðist til fulnar.

 - Verjuspælið var framúr gott, bæði seks ímóti seks og seks ímóti sjey, segði Peter Bredsdorff-Larsen.

 - Eg eri sera væl nøgdur við intensitetin, kroppsligu styrkina og ansni, tí fleiri av spælarunum ikki hava spælt dyst í tveir mánaðir. Tað sást ikki aftur, og tað var flott.

Savna seg um egnar uppgávur

Landsliðsvenjarin fegnaðist um útgangsstøðið, sum Føroyar nú hava undan seinna dystinum í Skopje, men minti á, at Norðurmakedónarar hava ein ótrúligan heimavøll.

Lykilin til HM-plássið er, at spælararnir hvør sær savna seg um sínar uppgávur og gloyma tað, sum hendir uttan fyri vøllin.

 - Tað duga spælararnir væl - tað riggaði væl í EM-endaspælinum at gloyma kringumstøðurnar, og tað vóru eisini stórar vónir til okkara í dag.

Seinni dysturin verður sunnudagin í Skopje.