Eldraøki fáa nú talgilda sjúklingajournal

Tvey eldraøki í landinum, Roðin og Norðoya bú- og heimatænasta, hava nú tikið í nýtslu talgilda sjúklingajournal.

Tað er sjúkrahúsverkið, sum er veitari av skipanini, og við henni ber til at fáa fatur í allar sjúklingajournalir tvørtur um geirar.

Heilsu- og umsorganartænastan í Tórshavnar kommunu er komin væl áleiðis í verksetanini. Bústovnar, dagtilhald, terapi og heimasjúkrarøkt og heimahjálp verða verksett í heyst. 

Ein sjúklingajournalskipan

Nú verður farið undir seinna partin av verkætlanini, sum snýr seg um at verkseta næstu fýra økini, sum eru VEKS, Bú- og heimatænastan í Suðuroy, Vesturvón og Økistænastan fyri Sandoyar sýslu.

Eftir ætlan er komið endaliga á mál fyri ársskiftið.

Við hesum samstarvi er politiska málið um, at tað bert skal vera ein sjúklingajournalskipan fyri føroyska borgaran, rokkið, sigur Kommunufelagið.
 
- Tað er okkum vitandi eindømi, at tað verður ein og  sama skipan tvørtur um geirar, og hetta verður ein stórur fyrimunur fyri borgaran eins og fyri starvsfólk, tá ið samskiftið gerst smidligari, skjótari og altíð dagført, skrivar Kommunufelagið á heimasíðuni.