Danmark hálvavegna viðurkent Palestina

Føroyar kunnu ikki viðurkenna Palestina sum sjálvstøðugt ríki.

Bara fullveldisríki kunnu viðurkenna onnur lond sum sjálvstøðug ríki.  

Danmark er ikki komið við einari einsíðis fráboðan um at viðurkenna Palestina sum sjálvstøðugt ríki.

Men Danmark er millum tey 143 ST-limalondini, sum tóku undir við aðalfundarsamtykt 10. mai.

Tann samtyktin víðkar heimildirnar hjá Palestina á aðalfundi Sameindu tjóða.

Tá eg svaraði, sum eg gjørdi, so var tað tí, at eg legði til grund, at Danmark við at taka undir við hesi samtykt eisini tekur undir við, at Palestina, sum frálíður og undir ávísum treytum, kann vera viðurkent sum sjálvstøðugt ríki.

Tað sigur Aksel V. Johannesen, løgmaður, í svari til Helgi Abrahamsen, løgtingsmann.

Helgi Abrahamsen spurdi, um landsstýrið hevur viðgjørt spurningin, um Føroyar skulu viðurkenna Palestina sum sjálvstøðugt ríki.

Danmark og Palestina

Hann spurdi eisini, hví løgmaður á tingfundi 15. mai segði, at Danmark í vikuni frammanundan viðurkendi Palestina sum ríki.

Helgi Abrahamsen spurdi, um øll almenn úttalilsi hjá landsstýrismanninum í uttanríkismálum eru at rokna sum ein fráboðan um almenna politikk Føroya.

18. desember í fjør segði landsstýrismaðurin í uttanríkis- og vinnumálum, at fortreytin fyri friði í Miðeystri er ein loysn við tveimum ríkjum.

Svarið kundi illa skiljast øðrvísi enn, at orðini hjá landsstýrismanninum vóru bæði støðutakanin og almenna fráboðanin vegna Føroyar, sigur Helgi Abrahamsen. 

Løgmaður svarar, at tá eitt aðalráð leggur eina fráboðan á sína heimasíðu, er hon yvirskipað at rokna sum ein almenn fráboðan.