- Tíðindi, mentan og ítróttur
Jarðhitaboringar sleppa ikki longur at dálka so illa
![](https://kvf.fo/sites/default/files/styles/grein-ovasta-mynd/public/borivognur.jpg?itok=rHMvEv2d)
Broytingar skulu gerast í lógini um hitapumpur við tí endamáli at verja umhvørvið og jarðfrøðina.
Jarðfeingi skal nú máta og skráseta jarðhitahol.
Kommunufelagið hevur gjørt vart við, at avbjóðingar eru við jarðhitaboringum.
Kommunurnar vilja tryggja, at dálking frá boridusti skal fyribyrgjast.
Nakrar kommunur eru givnar at geva loyvi til jarðhitaboringar, tí tær dálka so illa, var sagt tá, í fjør summar.
Krøvini til jarðhitaboringar eru ikki eftirmett, síðani tey komu 2012.
Á sumri í 2023 var ein arbeiðsbólkur settur at eftirmeta krøvini til jarðhitaboringar og gera tilmæli um møguligar tillagingar.
Uppskotini um tillagingar eru í høvuðsheitum at geva kommunum betri heimildir til at umsita umsóknir um boriloyvi og at hava eftirlit við jarðhitaboringum.
Góðar royndir
Royndirnar við jarðhita hava verið sera góðar, sigur Umhvørvismálaráðið.
Í fjør summar var mett, at tær hava gjørt, at 8.000 tons minni olja eru innflutt um árið.
Fyrstu jarðhitaskipanirnar komu í 2008.
Lógarbroytingarnar eru sendar til hoyringar.
Eitt uppskot um kunngerð, sum ásetir treytir til jarðhitaboringar, krøv um skrásetingar og gjald, er eisini sent til hoyringar.
Hoyringargfreistin er til á middegi 28. august.