Í dag byrja samráðingar um norðhavssildina

Fyrrapartin í dag hittast samráðingarfólkini hjá strandarlondunum aftur at tosa um norðhavssildina. Føroyar eru einsamallar uppi í móti Norra, ES, Íslandi og Russlandi, sum halda fast um gamla býtið frá 2007. Tann býtislykilin gevur Føroyum knappliga 5,2 prosent av heildarkvotuni.

105.000 tons

Føroyska sildakvotan í ár, sum Jacob Vestergaard, landsstýrismaður ásetti, er tó 17 prosent, 105.000 tons, og ikki 32.000 tons, sum hini londini siga, at Føroyar eiga. Fyrst í september fingu Føroyar undirtøku fyri einum uppskoti um at seta fiskifrøðingar at gera nýtt tilmæli um grundarlagið fyri sildabýtinum í framtíðini.

Á fundinum, sum byrjar í dag, skulu londini boða frá, hvørji vísindafólk, tey vilja hava við í arbeiðsbólkin. Ísland og Russland hava ikki enn boðað greitt frá, um tey vilja vera við í hesi royndini at loysa trætuna um norðhavssildina. Arbeiðsbólkurin skal vera liðugur fyri 1.oktober næsta ár, so strandarlondini hava okkurt nýtt at byggja samráðingarnar um kvotuna fyri 2015 á.

Minkar 32 prosent

Tað lættir neyvan um samráðingarnar nú um býtið í 2014, at ICES, altjóða havrannsóknarstovnurin, mælir til, at sildakvotan minkar knappliga 205.000 tons, 32 prosent, næsta ár, so kvotan verður 420.000 tons í 2014. Tríggir dagar eru settir av til samráðingarnar um norðhavssildina, sum vera á skrivstovuni hjá NEAFC í London.

Mikudagin í næstu viku verður so farið í holt við makrelin. Har hava Føroyar og Ísland tikið sær nógv størri kvotur enn ES og Norra siga, at londini hava rætt til. Og ES-bokoyttið og landingarforboðið í Norra móti sild og makreli úr Føroyum standa við, nú farið verður undir samráðingarnar um sildina og makrelin fyri næsta ár.