- Tíðindi, mentan og ítróttur
21-landsliðið fer eftir øllum stigunum
![](https://kvf.fo/sites/default/files/styles/grein-ovasta-mynd/public/eydun_klakstein_mynd.jpg?itok=LY2m9N4P)
Føroyska U21-manslandsliðið í fótbólti fer eftir sigrinum, tá Grikkaland vitjar við Djúpumýru seinnapartin til EM-undankappingardyst.
- Grikkaland er eitt gott lið, men vit spæla fyri at vinna. Avrikið hjá okkum ímóti Kroatia í farnu viku var gott, men vit iðra okkum eisini um, at vit einki stig høvdu við okkum heim aftur. Í annaðkvøld ætla vit tað øðrvísi, sigur U21-landsliðsvenjarin, Eyðun Klakstein, við heimasíðuna hjá FSF.
Føroyar hava spælt tveir heimadystir higartil í hesi EM-undankappingini. Fyrri dysturin endaði við 2-2 javnleiki ímóti Andorra, meðan hin seinni endaði 4-2 til Kroatia.
- Vit hava spælt tveir dystir í hesari undankappingini á Djúpumýru, og tað hava verið góðar upplivingar. Vit hava fingið góðan stuðul frá áskoðarum, avrikini hava verið góð, vit hava skorað fýra mál og vunnið stig, og tí gleða vit okkum til enn ein dyst í Klaksvík, sigur Eyðun Klakstein.
Til dystin móti Grikkalandi í morgin verður venjarin noyddur at síggja burtur frá Gullbrandi Øregaard, Noah Mneney og Eliasi Rusborg, ið allir eru leikbannaðir. Harafturat eru aðrir, ið eru darvaðir av skaðum.
- Nakað av útskifting hevur verið á U21 landsliðnum hesa ferð, men vit eru væl nøgdir við hópin. Vit hava nóg mikið av góðum spælarum og førleikum til at fara eftir sigrinum ímóti Grikkaland. Vit hava eisini fyrireikað okkum væl seinastu dagarnar, og nú skulu vit avrika so væl, at vit kunnu fáa nakað burtur úr dystinum, sigur Eyðun Klakstein við fsf.fo.
Síðsta hósdag taptu Føroyar 2-1 á útivølli ímóti Kroatia. Beinir Nolsøe skoraði føroyska málið. Í november spældu føroyingarnir í Grikkalandi. Ta ferðina vunnu grikkar 3-0.