Danskir ríkisborgarar sleppa til Kina uttan visum

Í framtíðini kunnu føroyingar ferðast til Kina uttan at neyðugt verður at biðja um innferðarloyvi frammundan.

Á fundi millum danska uttanríkisráðharran, Lars Løkke Rasmussen, og kinesiska uttanríkisráðharran, Wang Yi, boðaði kinesiski ráðharrin frá, at Kina fer at seta í verk broytingar, so danskir ríkisborgarar kunnu ferðast inn í landið uttan visum. 

Tað boðar danska uttanríkisráðið frá, skrivar TV2. 

Avtalan er liður í einum størri strategiskum samstarvi millum londini, verður sagt.

Nær visumfría ferðin verður sett í gildi, og hvussu nógvar vikur talan er um, at til ber at vera í landinum uttan visum, er ikki greitt enn. 

Herfyri gjørdu Kina og Noreg líkandi avtalu.