Útlendingar skulu gjalda fyri Bussleiðina

Stendur tað til fíggjarnevndina í Tórshavnar kommunu, skulu útlendsk ferðafólk frameftir gjalda fyri at brúka Bussleiðina í Havn. Og tað skulu føroyingar, sum búgva aðrastaðni enn í høvuðsstaðarkommununi, kanska eisini.

Á býráðsfundinum í kvøld er eitt av teimum 25 málunum á skránni ein gjaldsskipan til Bussleiðina.

Kostar 36 milliónir

Í dag er skipanin tann, at tað einki kostar hjá brúkarum at koyra við Bussleiðini. Tað vil samstundis siga, at tað er kommunan, og harvið skattaborgararnir í Tórshavnar kommunu, sum fíggja kommunalu bussleiðina í høvuðsstaðnum. 

Sambært roknskapinum hjá kommununi kostaði tað slakar 36 milliónir krónur at reka Bussleiðina í fjør.

Tað hevur í fleiri ár verið ein politiskur vilji at broyta skipanina soleiðis, at í minsta lagi útlendsku ferðafólkini skulu gjalda fyri at brúka Bussleiðina, og í upprunaupplegginum standa aðrir føroyingar eisini nevndir. 

Eisini verður ført fram, at verandi skipan hevur neiliga ávirkan, og er kappingaravlagandi fyri hýruvognsvinnuna í høvuðsstaðnum.

El-bussar, Elbussar, Bussleiðin í Havn

(Mynd: Tórshavnar kommuna)

Trý sløg av ferðaseðlum

Ein av avbjóðingunum við málinum hevur verið, hvussu tað praktiskt skal skipast og loysast, og sum málið liggur nú, er ein app, sum er knýtt at bókhaldsskipanini hjá kommunini, gjørd, og tað verður á hesi appini, at ferðaseðlarnir skulu keypast.

Málið var fyri á fundi í fíggjarnevndini hjá kommununi 20. juni, og tilmælið haðani var, at tað skulu gerast trý sløg av ferðaseðlum. Ein 24-tíma ferðaseðil, ein tríggjar daga ferðaseðil og ein vikuferðaseðil. Tá var mælt til, at tey skuldu kosta ávikavist 50, 120 og 210 krónur, og sum skilst, bygdi tað á eina samanberingar við prísirnar í t.d. Reykjavík.

Men nú málið hevur verið aftur í fíggjarnevndini fyrst í hesum mánaðinum, eru prísuppskotini broytt, so tað eftir ætlan skal kosta 100 krónur fyri ein samdøgursferðaseðil, 200 krónur fyri trý samdøgur og 500 krónur fyri ein vikuferðaseðil.

Ikki semja

Tað er tó ikki heilt semja í fíggjarnevndini um henda partin, og tí er tað meirilutin við Heðini Mortensen, Kára Johansen, Trónda Sigurðssyni og Birgiri Nielsen, sum mæla til hægru prísirnar. Jákup Dam tekur undir við upprunaliga tilmælinum.

Tað stendur einki í dagsskránni, nær ætlanin er at seta skipanina í gildi. Tað er tó ikki óhugsandi, at skipanin kemur í gildi við ársbyrjan.

Sum skilst er í løtuni ikki semja, um skipanin skal galda fyri aðrar føroyingar frá byrjan. Har eru nakrir óloysir spurningar, sum millum annað kunnu raka bygdanæmingar, sum eitt nú lesa á Glasir.