Georgiski forsetin viðurkennir ikki valúrslitið

- Vit hava verið fyri russiskum ágangi.

Tað segði georgiski forsetin, Salome Zourabichvili, í sjónvarpaðari røðu í gjárkvøldið. Hon viðurkennir sostatt heldur ikki úrslitið av tjóðartingsvalinum leygardagin.

Saman við ákærunum um valsvik, bað hon eisini fólk um at fara út á gøturnar at mótmæla valúrslitinum, skrivar m.a. danska TV2.

Seinnapartin í gjár komu eisini fram frágreiðingarnar frá valeygleiðarunum hjá OSCE,  sum er felagsskapurin fyri trygd og samstarv í Evropa.

OSCE, valeygleiðarar í Georgia, val í Georgia

Eygleiðarar hjá OSCE siga, at svik var framt á valinum í Georgia. (Mynd: Reuters Ritzau Scanpix)

Atkvøður keyptar

Á tíðindafundi segði samskiparin fyri OSCE, at atkvøður vóru keyptar, atkvøtt var fleiri ferðir, og eftirlit var á valstøðum við vakmyndatólum, sum fylgdu og møguliga stýrdu veljarum. Sambært OSCE elvdi hetta til, at fólk kendu seg trýst til at atkvøða á ein ávísan hátt.

Vinnandi flokkurin, Georgiski dreymurin, fekk sambært valnevndini 54 prosent av atkvøðunum. 

Andstøðan, sum tapti valið, viðurkennir eins og forsetin ikki valúrslitið.

Amerikanski uttanríkisráðharrin, Antony Blinken, sigur, at ein kanning eigur at verða sett í verk, um brot er framt á vallógina í Georgia, skrivar danska kringvarpið.