Uppstilling: Níggju fleiri enn seinast

Til kommunuvalið í 2000 stillaðu 957 fólk upp í 48 ymsum kommunum kring landið.

Men síðan tá er talið av kommunum minkað nógv, og tað sama er talið av teimum, sum stilla upp til kommunuval.

Longu í 2004 vóru kommunurnar minkaðar úr 48 niður í 34, og talið av valevnum minkaði samsvarandi úr 957 niður í 783. Hetta tíðarskeiðið fóru Elduvíkar, Oyndarfjarðar og Skála kommunur upp í Runavíkar kommunu; Gjáar, Haldórsvíkar, Hósvíkar, Hvalvíkar og Saksunar kommunur gjørdust partur av Sunda kommunu; Bíggjar og Mykinesar kommunur fóru upp í Sørvágs kommunu; og Hests og Nólsoyar kommunur blivu partur av Tórshavnar kommunu.

Frá 2004 til 2008 minkaði talið av kommunum við fýra afturat. Svínoyar kommuna fór upp í Klaksvíkar kommunu; Funnings kommuna fór upp í Runavíkar kommunu; Leirvíkar og Gøtu kommunur vóru blivnar til Eysturkommunu; og Sandavágs og Miðvágs kommunur vóru nú Vága kommuna. Enn einaferð sást minkingin í kommunum aftur í talinum av uppstillaðum, sum fór frá 783 fólkum í 2004 niður í 636 fólk í 2008.

Á kommunuvalinum í 2012 vóru framvegis 30 kommunur í landinum, men kortini minkaði talið av uppstillaðum úr 636 niður í 602 fólk.

Í 2016 var Húsa kommuna eisini farin upp í Klaksvíkar kommunu, so nú vóru 29 kommunur eftir. Talið av uppstillaðum minkaði úr 602 niður í 594 fólk.

Á valinum í 2020 stillaðu 547 fólk upp í 29 kommunum, og tað er tað minsta í hesi øldini. Á valinum hesaferð er talið av uppstillaðum kvinkað eitt lítið sindur upp eftir aftur, tí hesaferð stilla 556 fólk upp. Samstundis er hetta fyrstu ferð í hesi øldini, at talið av uppstillaðum veksur.

Uppstillaði og kommunur

2024: 556 fólk stilla upp í 29 kommunum

2020: 547 fólk stillaðu upp í 29 kommunum

2016: 594 fólk stillaðu upp í 29 kommunum

2012: 602 fólk stillaðu upp í 30 kommunum

2008: 636 fólk stillaðu upp í 30 kommunum

2004: 783 fólk stillaðu upp í 34 kommunum

2000: 957 fólk stillaðu upp í 48 kommunum

(Keldur: kvf.fo/val og valurslit.fo)