Landsbankastjórin: Fleiri rentulækkingar á veg í 2025

Evropeiski miðbankin lækkaði fyri kortum rentuna við 0.25 prosentstigum. Hetta var fjórða rentulækkingin hjá ECB, síðan í juni, og fleiri rentulækkingar eru á veg í 2025, sigur stjórin í landsbankanum.

 - Rentan hjá ECB er nú trý prosent, men tað er framvegis ein renta, sum ger, at tað er ein strammur pengapolitikkur. Tey vilja fegin koma niður á neutrala rentu, tað vil siga, at rentan hvørki er strøm ella lagalig, sigur Malan Johansen.

Mett verður, at ein lagalig renta skal liggja á umleið tveimum prosentum.

 - Og so er tað eitt heilt prosent niður til tvey, so vit kunnu gott vænta, at vit fáa rentulækking aftur næsta ár upp á umleið eitt prosent. Tað kann so henda í fýra umførum við 0.25 hvørja ferð, men tað vita vit ikki, sigur stjórin í landsbankanum.

Bíligari fyri vanliga lánaran

Hetta fer eftir øllum at døma at hava við sær, at vanligi føroyski lánarin við skiftandi rentu sleppur bíligari.

 - Tað merkir, at tann vanliga variabla rentan, sum tey allarflestu við sethúsaláni hava, fer at lækka. Hvussu nógv hon fer at lækka er treytað av, um tað er eitt til eitt, ella um bankarnir velja at seta rentuna minni niður enn tjóðbankin ger, sigur Malan Johansen.

Betri Banki varð í gjár fyrsti føroyski peningastovnurin, sum lækkaði rentuna í hesum umfarinum, men í mun til rentulækkingina hjá ECB og seinni hjá tjóðbankanum upp á 0.25 prosentstig, var lækkingin hjá Betri Banka 0.15 prosentstig.