Bolsonaro ákærdur fyri kvettroynd

Fyrrverandi brasilianski forsetin, Jair Bolsonaro, er nú - av brasilianska ríkisákæranum - ákærdur fyri kvettroynd.

Tað skrivar Reuters.

Sambært ákæruni vóru Bolsonaro og 33 onnur fólk við í kvettroyndini. 

Kvettroyndin var stutt eftir, at Jair Bolsonaro hevði tapt valið fyri núverandi forsetanum, Lula, í 2022.

Trokaðu seg inn í tjóðartingið

Í januar í 2023 trokaðu viðhaldsfólk hjá fyrrverandi forsetanum, Jair Bolsonaro, seg inn í tjóðartingsbygningin og hægstarættarbygningin í høvuðsstaðnum, Brasilia, og framdu herverk.

Longu í november var politiið liðugt við sítt kanningararbeiði. Politiið kom til ta niðurstøðu, at Bolsonaro hevði verið beinleiðis uppi í ætlanunum.

Bolsonaro hevur fleiri ferðir noktað seg sekan í ákærunum.