Íslendska kringvarpið kann missa rættin at senda lýsingar

Íslendska kringvarpið, RÚV, missir kanska rættin til at senda lýsingar.

Tað skrivar RÚV sjálvt á síni heimasíðu.

Íslendski mentamálaráðharrin, Logi Einarsson, sigur í svari til fyrispurning frá altingsliminum, Dilju Mist Einarsdóttir, at støða enn ikki er tikin til, um RÚV framhaldandi skal sleppa at selja lýsingar í kapping við privata marknaðin.

Men hann sigur, at hann ætlar at seta ein arbeiðsbólk við trimum fólkum at kanna møguleikar fyri at minka um partin hjá almenna kringvarpinum á lýsingamarknaðinum.

Kappingaravlagandi

Privatu miðlarnir í Íslandi hava í fleiri ár víst á, at tað er kappingaravlagandi, at ein almennur miðil skal kappast við privatu miðlarnar um lýsingar. 

Tað hevur tó eisini verið víst á, at eitt møguligt bann fyri lýsingum í RÚV ikki neyðturviliga hevði komið privatu íslendsku miðlunum til góðar, tí tað kundi eisini havt við sær, at fyritøkur í staðin fóru at lýsa meira á eitt nú Facebook og YouTube. Tað hevði ført til, at lýsingarpengarnir fóru av landinum, og so er einki vunnið, sigur íslendski mentamálaráðharrin.

Ein annar arbeiðsbólkur kom í 2023 til ta niðurstøðu, at RÚV skuldi missa rættin til at senda lýsingar, men afturfyri skuldi kringvarpsgjaldið setast upp.