Eingin undirtøka

Fólkaflokkurin hevur heldur ikki undirtøku í andstøðuni fyri uppskotinum hjá sær um størri botnfrádrátt í kommunuskattinum.

Fíggjarnevndin hevur viðgjørt uppskotið.

Allir flokkar, uttan Fólkaflokkurin, eru í meirilutanum, sum mælir tinginum frá at samtykkja uppskotið.

Millum annað vísir meirilutin á, at kommunurnar vilja ikki hava størri botnfráfrátt.

Landsbankin hevur eisini sagt, at tað er ikki ein gongd leið hjá haldførinum hjá almennu Føroyum at hækka botnfráfráttin hjá kommununum.

Ikki fíggjað

Haraftrat er uppskotið hjá Fólkaflokkinum ikki fíggjað, sigur meirilutin.

Og uppskotið ger ikki serligan mun hjá teimum fíggjarliga sperdu.    

Hetta er aðru ferð, at Fólkaflokkurin roynir at fáa botnfrádráttin í kommunuskattinum hækkaðan upp í 65.000 kr.

Endamálið er, sigur Fólkaflokkurin, at kommunurnar sjálvar kunnu áseta botnfrádráttin millum 30.000 og 65.000 kr.