Óli: Vit eru óstýriligir í dag

Ukrainar vistu snøgt sagt ikki, hvat teir skuldu gera eftir steðgin. Ferð eftir ferð fór Óli Mittún flúgvandi ígjøgnum verjuna hjá útiliðnum, og Føroyar vann til endans 35-27 og tryggjaði sær bólkasigurin.

 - Annar hálvleikur var so at siga perfektur bæði í verjuni og álopinum. Vit fáa høllina við, og so eru vit so at siga óstýriligir, segði hondbóltsúrmælingurin, sum skeyt seks mál. 

Liðini fylgdust nøkulunda í fyrra hálvleiki, og heimaliðið var frammanfyri við tveimum í steðginum. Hetta helt fram til eitt korter var eftir av dystinum. Tá strammaðu føroyingar spæli upp í báðum endum, og fóru við ferð frá gestunum.

Óli Mittún var gestur hjá Jógvani Skeel Nolsøe og Juliani Johansen eftir dystin, og hann fekk høvi til at arga sín gamla hjálparvenjara eitt sindur.