Seks prosent minni vakstrarhúsgass í fjør

Útlátið av vakstrarhúsgassi minkaði seks prosent í fjør, sigur Umhvørvisstovan.

Minkingin kemst serliga av, at føroysk fiskiskip, ídnaður og elframleiðsla brúktu minni olju enn í 2023.

Útlátið var rættiliga støðugt millum 2001 og 2016. 

Síðan vaks tað á hvørjum ári millum 2016 og 2021. 

Í 2022 minkaði útlátið fyri fyrstu ferð í meira enn tíggju ár. 

Vaks aftur í 2023

Í 2023 vaks tað aftur frá einari millión og 100.000 tonsum í 2022 upp í eina millión og 130.000 tons.

Men í fjør fór tað niður í eina millión og 60.000 tons, sigur Umhvørvisstovan.

Sambært Umhvørvisstovuni bunkraðu føroysk fiskiskip átta prosent minni olju í 2024 enn í 2023.

Ídnaðurin brúkti 15 prosent minni, SEV brúkti níggju prosent minni, og húsarhaldini brúktu níggju prosent minni olju.

Les frágreiðing her.