Einki loyvi uttan góðkenda eginfigging

Orsøkin til, at Mentamálaráðið ikki gevur kirkjuráðnum á Argjum loyvi at byggja nýggja kirkju, er fíggingin hjá kirkjuráðnum.

Kirkjuráðið skal fíggja ein triðing av byggikostnaðinum.

Kirkjuráðið sigur seg hava hesa fígging.

Men Mentamálaraðið góðtekur ikki, hvussu kirkjuráðið hevur fingið hesa fígging.

Kirkjuráðið hevur tikið við afturberingina av meirvirðisgjaldi, kirkjuskattin í ár og søluna av verandi Argja kirkju.

Og tað ber ikki til, sigur Bergur Berg, fulltrúi í Mentamálaráðnum.

Tí MVG-afturberingin er at rokna sum stuðul úr landskassanum, allur kirkjuskatturin fyri 2025 er ikki komin enn, og tað, Mentamálaráðið veit, er gamla kirkjan ikki seld. 

Kirkjan á Argjum og eitt óbygt grundøki við síðuna av kirkjuni eru til sølu hjá Skyni.

Prísuppskotið er sjey milliónir krónur.

Bara eitt loyvi eftir

Mentamálaráðið hevur fingið at vita, at nýggja kirkjan fer at kosta 82 mió.kr. uttan meirvirðisgjald.

Loyvið frá Mentamálaráðnum er tað einasta, sum vantar, áðrenn farast kann undir at byggja kirkjuna við Sandá. 

Men tað loyvið fær kirkjuráðið ikki, fyrr enn eginfíggingin er í lagi, sigur Bergur Berg.

Og enn resta nakrar milliónir í, at so er. 

Málið um nýggja kirkju á Argjum byrjaði av álvara fyri 15 árum síðani.