Róland Toftum: Fantastiskt

“Fantastiskt”, sigur Róland Toftum tá hann verður biðin um, at seta eitt orð á avrikini seinastu fýra dagarnar á oyggjaleikunum í Orknoyggjunum. Føroyar vunnu sjey gull, 11 silvur og 10 bronsuheiðursmerki.

Fleiri av gullheiðursmerkjunum vóru sannførandi. Serliga tey hjá Líggjasi Joensen og Elisabeth Erlendsdóttir. Tað manglaði onkrar ferðir lítið í, at silvur bleiv til gull. Millum annað vóru tað bara fimm hundraðpartar av einum sekundi á muni millum Føroyar og vinnararnar av Isle of Man í 4x50 metur blandað mix-stafettini.

- Vit hava vunnið eina stafett, tað gjørdu vit ikki seinast. Vit kunnu ikki iðra okkum um nakað, tí øll gjørdu alt tað tey vóru ment, sigur Róland Toftum.

Føroyar blivu nummar tvey í svimjingini. Jersey og stórtaletið Filip Nowacki vunnu 13 gull, 11 silvur og átta bronsur.