Roynir at fáa lív í aftur pumpuskipanina hjá SEV

Tað er ein gamal tanki at gera Føroya størsta battarí í Vestmanna. Fyrst var tað privata felagið Røkt, sum vildi sleppa at gera pumpuskipanina. So kom stríð um rættindini til vøtnini, og tað ednaði við, at tað bleiv SEV, sum skuldi gera pumpuskipanina.

Tankin við pumpuskipanini er at goyma orku frá vindi í vatni. Tað skal gerast við at brúka vindorku frá vindmyllum at pumpa vatn frá niðara vatninum á Mýrunum upp í ovara vatnið á Mýryunum. Og tá so ongin vindur er, so letur man vatnið renna úr ovara vatninum gjøgnum turbinuna, so tað framleiðir streym, áðrenn tað fer í aftur niðara vatnið, og kann pumpast upp aftur, tá vindurin kemur aftur. Og soleiðis skal tað koyra aftur og fram og framleiða grønan streym.

Og eisini myndugleikarnir halda pumpuskipanina vera eitt gott hugskot.

Í 2022 góvu kommunurnar gjøgnum aðalfundin nevndini  í SEV heimild at byggja pumpuskipanina Vestmanna. Hon skuldi kosta 1,3 milliardir krónur. 

Fíggingin kom eisini upp á pláss gjøgnum lánistovnar, men tá tilboðini uppá pumpuskipanina vórðu latin upp, fekk SEV nevndin ein skelk. Lægsta tilboðið var slaka milliard oman fyri tann prísin, ið nevndin hevði fingið heimild til. Kostnaðurin var nú 2,2 milliardir krónur, og táverandi nevndarformaðurin valdi at siga stopp.

Og so er spuningurin, um júst tað fer at bera til hjá Haraldi Símunarson Hammer, sum er nýggjur nevndarformaður.