Hevur siglt sín seinasta túr við Sam

30.000 túrar.

So ofta hevur Sámal Petur í Grund ført strandfaraskipið Sam um Kallsoyarfjørð. 

Men seinasta sunnudag hevði hann sín seinasta túr eftir at hava røkt starvið sum skipari á Sam í 21 ár. Hann hevur annars starvast hjá Strandferðsluni í 25 ár. 

- Eg havi trivist ómetaliga væl í starvinum øll hesi árini, og kallsoyingar hava verið sum familja. Tað hevur ikki verið ein føðingardagur ella eitt brúdleyp, uttan at tey hava borið okkum mat umborð. Vit hava notið heilt ótrúliga gott av kallsoyingum  og hava havt eitt ómetaliga gott vinarlag, sigur Sámal Petur í Grund.

Túrurin um Kallsoyarfjørð tekur vanliga umleið 20 minuttir at sigla, men hetta er ein farleið, sum krevur, at tú hevur neyðugu vitanina um eitt nú streym og rák á leiðini.

- Hevur tú vindin upp í ættina, so blívur ómetaliga óslætt, og tað er serliga vestfallið, sum ger seg galdandi. Í høgætt og vestfalli kunnu vera ordilig brot, og tá mugu vit sigla meira suðurá, sigur Sámal Petur í Grund og leggur afturat, at tað gingu seks ár, áðrenn hann veruliga føldi, at hann kendi allar konditiónirnar, soleiðis at hann kundi sigla í myrkri uttan at ivast í, hvussu hann skuldi sigla.

Í morgunsendingini hyggur Sámal Petur í Grund aftur á mongu árini sum skipari á Sam.