Zlatko Dalic: Tit sleppa at síggja Luka Modric

Kroatiska landsliðið er lent í Føroyum og hevur havt tíðindafund á Tórsvølli í kvøld. Á tíðindafundinum vóru Zlatko Dalic, sum hevur verið kroatiskur landsliðsvenjari síðani 2017, og verjuspælarin úr Fiorentina, Marin Pongračić.

Báðir tveir hildu fyri at Kroatia skal vinna dystin, men ásannaðu eisini at tað verður ikki lætt. Fyrstur at svara var Marin Pongračić. Hann segði ikki so nógv, men eftir at hava sagt at Kroatia skuldi hava seks stig í hesum landsliðsumfarinum, so segði hann eisini at Kroatia má fyrst og fremst vinna hendan dystin.

 - Eg vænti at vit koma at hava bóltin nógv og skulu leypa á. Vit skulu spæla skjótt, skjóta upp á mál og fáa nógv innlegg. Tað er eisini týdningarmikið, at vit fáa fyrsta málið, tí tað kann gera at vit fáa meira pláss at spæla á. Vit mugu eisini vísa ábyrgd í verjustøðu, segði Marin Pongračić, sum ongantíð hevur roynt at spælt móti føroyskari mótstøðu.

zlakto_dalic_og_marin_pongracic.jpg

Frítekst tagging: 

Zlakto Dalic

Kroatia Fótbóltslandsliðið

Venjarin hjá Kroatia lovaði tvey ting. Áskoðararnir á Tórsvølli sleppa at síggja Luka Modric, og at kroatar ongantíð – so leingi hann er venjari – sleppa at undirmeta ein mótstøðu.

 - Ja, tit sleppa at síggja Luka Modric. Vit vænta ikki ein lættan dyst. Vit skulu ansa eftir deyðbóltunum og langu sendingunum hjá føroyingunum. Vit skulu hava tol við bóltinum og ikki lata fjáltur koma á okkum, um vit fáa mál beinanvegin, segði Zlakto Dalic.

a_menn_kroatia_venjing_04-09-2025-03.jpg

Frítekst tagging: 

Luka Modric

Hann legði afturat, at hann stólar upp á sínar spælarar, at taka røttu avgerðirnar við bóltinum, fyri at lata føroysku verjuna upp. Kroatia er uttan Manchester City spælararnar Mateo Kovačić og Joško Gvardiol.

HM-undankappingardysturin millum Føroyar og Kroatia verður í annaðkvøld klokkan 19.45. Sjónvarpið hjá Kringvarpinum vísur dystin eftir Dag og Viku.