Jórun Mai Smith skrivaði judosøgu

Jórun Mai Smith gjørdist um vikuskiftið fyrsti føroyingur, sum kappaðist í sonevndari adapted judo-kapping í Póllandi. 

Hon hevur downsyndrom og venur í Havnar Judofelag.

 - Vit venja ikki adapted judo ella servenjing, men hava altíð havt íðkarar við serligum tørvi við í vanligu venjingini. Onkur hevur rørslutarn, og onkur hevur menningartarn, men øll venja saman, sigur Sanna Nolsøe Djurhuus, venjari og skrivari í Judo Føroyum í samrøðu við heimasíðuna hjá evropeisku judosamgonguni. 

Jórun Mai Smith byrjaði at íðka judo sum 10 ára gomul, og hon vísti skjótt hegni. Í Føroyum hevur ikki borið til at kappast í tillaganum judo, og tí kemur væl við, at tað nú ber til at kappast uttanlands, sigur Sanna Nolsøe Djurhuus við eju.net.