Galaxy sigldi ólógliga

Kringvarpið hevur eina mynd, sum er tikin á biladekkinum á Galaxy klokkan 19.36 hetta kvøldið, sum greitt vísir, at portrið er opið.

- Um eg hevði verið skipari, hevði eg ikki loyst skipið, um portrið ikki var væl aftur og skalkað. Tað hevði ikki verið trygt. 

Tað sigur Jón Helmnsdal, undirvísingarleiðari á navigatørdeildini á Vinnuháskúlanum.

Altjóða reglur siga, at ferjur ikki hava loyvi til at loysa og fara frá bryggju, fyrr enn portrið er afturlatið, skalkað og stongt. Hesar reglur verða nevndar SOLAS, og eru eisini galdandi í Føroyum.

- Krøvini eru ikki hildin, og tá er tað ikki trygt at sigla. 

Tað sigur Thormund Johannesen, skipsverkfrøðingur 

Kannað í dag
Skipaeftirlitið hevur í sambandi við áheitan frá Kringvarpinum kannað viðurskiftini umborð á Galaxy, tá skipið fór av Krambatanga klokkan 14 í dag. Tá var alt í lagi við hekkuportrinum.

Á middegi hendan 1. september, fekst hekkuportið ikki upp, og tí sluppu fólk ikki í land á Krambatanga. Og tað var hetta kvøldið, at skipið sigldi við opnum portri.