Prísvøksturin eitt prosent seinasta árið

Prísvøksturin er nú 1,1 prosent, skrivar Hagstovan.

Tað er frá august í fjør til august í ár.  

Prísvøksturin seinasta árið hevur verið lítil og støðugur, eftir at hava verið stórur í nógv ár. 

Kortini er prísvøksturin á mati og drykkjuvørum framvegis stórur samanborið við aðrar vørur og tænastur, skrivar Hagstovan.

Prísirnir eru hækkaðir 20 prosent seinastu fimm árini.

Seinastu fimm árini eru mat- og drykkjuvørur tó dýrkaðar næstan 30 prosent. Serliga kaffi, te og kakao eru dýrkað. 

Lægri renta togar prísvøksturin niður

Miðalrentan er lækkað 30 prosent seinasta árið, og tað togar prísvøksturin niður. 

Hinvegin er prísurin á húsaleigu hækkaður sløk 12 prosent.

Hagstovan skrivar, at árligi prísvøksturin í Føroyum er minni enn miðalprísvøksturin í ES londunum.

Prísvøksturin í Danmark er tvey prosent. 

Størstur er prísvøksturin í Íslandi, har hann er 3,8 prosent.